FIR -போடச் சொன்னது நீங்களே இடைநீக்கம் செய்ததும் நீங்களே ! லஞ்ச ஒழிப்புத்துறை ஆய்வாளர் விமலாவை காப்பாற்றிய உயர்நீதிமன்றம் !!?

“FIR போடச் சொன்னது நீங்களே, இடைநீக்கம் செய்ததும் நீங்களே!” – லஞ்ச ஒழிப்புத்துறை ஆய்வாளர் விமலாவை காப்பாற்றிய உயர்நீதிமன்றம்!

மேலதிகாரிகள் உத்தரவின் பேரில் FIR பதிந்த பெண் ஆய்வாளருக்கு ‘உள்நோக்கத்துடன்’ சஸ்பெண்ட் – ‘கருப்பு நியூஸ்’ வெளிச்சம் போட்டுக் காட்டும் DVAC இன் உள் சூழ்ச்சிகள்!

லஞ்ச ஒழிப்புத்துறையில் (DVAC) பணியாற்றும் ஒரு பெண் ஆய்வாளர், தனது மேலதிகாரிகளின் நேரடி உத்தரவின் பேரில் ஒரு எஃப்.ஐ.ஆர் பதிவு செய்ததற்காகவே இடைநீக்கம் செய்யப்பட்ட சம்பவம் தமிழக காவல்துறை வட்டாரத்தில் பெரும் அதிர்வலைகளை ஏற்படுத்தியுள்ளது. அதிகார துஷ்பிரயோகம் மற்றும் இரட்டை வேடம் இங்கும் பிரதிபலிக்கிறது. ஆய்வாளர் uவிமலா என்பவருக்கு விதிக்கப்பட்ட இந்த இடைநீக்க உத்தரவு “உள்நோக்கத்துடன்” பிறப்பிக்கப்பட்டுள்ளதாக சென்னை உயர்நீதிமன்றம் கருத்து தெரிவித்து, அதற்கு இடைக்கால தடை விதித்துள்ளது.
தன் மீது பாய்ந்த பழியை தட்டிக் கேட்ட ஆய்வாளருக்கு நீதிமன்றம் கவசமாக நின்றுள்ளது.

பின்னணி:

01) கண்காணிப்பாளரைக் கண்காணித்தால் சஸ்பென்ஷனா?
ஆய்வாளர் விமலா, லஞ்ச ஒழிப்புத்துறையில் பணியாற்றியபோது, இன்ஸ்பெக்டர் ராஜலட்சுமி என்ற அதிகாரி மீது முதற்கட்ட கண்காணிப்பு விசாரணை மேற்கொண்டார். இந்த விசாரணையின் போது, கண்காணிப்புத் துறை அதிகாரிகளே அவருக்கு எஃப்.ஐ.ஆர் பதிவு செய்யுமாறு உத்தரவிட்டதோடு, அந்த எஃப்.ஐ.ஆர் வரைவையும் தயாரித்துக் கொடுத்து உள்ளனர் என்பது நீதிமன்றத்தில் தாக்கல் செய்யப்பட்ட ஆவணங்கள் மூலம் தெரியவந்துள்ளது. அந்த வரைவு, லஞ்ச ஒழிப்புத்துறை இயக்குநரின் ஒப்புதலுக்காக அனுப்பப்பட்டு, 12.02.2026 அன்று காவல் கண்காணிப்பாளரால் (SP) திருத்தங்கள் செய்யப்பட்ட பின்னரே எஃப்.ஐ.ஆர் பதிவு செய்யப்பட்டுள்ளது. ஆனால், பின்னர் இதே எஃப்.ஐ.ஆர் விவகாரம் தொடர்பாக, ஆய்வாளர் விமலா ‘லஞ்சம் கேட்டதாக’ ஒரு புகார் எழுப்பப்பட்டு, டிஐஜி என்.தேவராணி வழியாக அது லஞ்ச ஒழிப்புத்துறை இயக்குநர் அருணின் கவனத்திற்கு கொண்டு செல்லப்பட்டு, விமலா இடைநீக்கம் செய்யப்பட்டார்.

முக்கிய நிகழ்வுகள்:

02) கட்டளை இட்டவர்கள்’ பத்திரமாக, ‘கடிதம் போட்டவர்’ மட்டும் பலி ஆனது ஏன் ?

இந்த சம்பவத்தில் மிக முக்கியமான முரண்பாடு என்னவென்றால், எஃப்.ஐ.ஆர் பதிவு செய்வதற்கான உத்தரவு விமலாவின் மேலதிகாரிகளிடம் இருந்தே வந்தது என்பதை நீதிமன்ற ஆவணங்கள் உறுதிப்படுத்தியுள்ளன. அப்படியிருந்தும், அந்த உத்தரவை நிறைவேற்றிய ஆய்வாளர் மட்டும் ‘தவறு செய்தவர்’ போல இடைநீக்கம் செய்யப்பட்டது ஏன் என்ற கேள்வி எழுந்துள்ளது. மேலும், இந்த விவகாரத்தில் தொடர்பு இருப்பதாக சந்தேகிக்கப்பட்ட டிஎஸ்பி ஜாய் என்பவர், நீலகிரி மாவட்டத்திற்கு வெறும் ‘பணியிட மாற்றம்’ செய்யப்பட்டார். சென்னை உயர்நீதிமன்றம், ஜூன் 17 அன்று பிறப்பிக்கப்பட்ட இந்த இடைநீக்க உத்தரவு ‘உள்நோக்கத்துடன்’ பிறப்பிக்கப்பட்டதா என்ற சந்தேகம் எழுவதாகக் கூறி, ஜூலை 9 வரை இடைக்கால தடை விதித்துள்ளது. இது, தமிழக அதிகாரத்துவத்தில் நிலவும் ‘பலிகடா’ கலாச்சாரத்தை மீண்டும் ஒருமுறை அப்பட்டமாக்கியுள்ளது.

லஞ்ச ஒழிப்புத்துறை என்பது ஊழல்களை ஒழிக்கும் அமைப்பா, அல்லது அதிகாரத்தின் ‘டார்ச்’ பிடித்தவர்களை ஒழிக்கும் அமைப்பா?

இந்த வழக்கு பிந்தையதைத்தான் நிரூபிக்கிறது. மேலே இருந்து வரும் உத்தரவை அப்படியே நிறைவேற்றும் கீழ்நிலை அதிகாரி, அது ‘அரசியல் ரீதியாக உசிதமில்லை’ என்று மாறும்போது பலியாடாகிறார். இங்கு உண்மையான ‘குற்றவாளி’ என்பது ஆய்வாளர் விமலாவை FIR பதிய வைத்து, பின்னர் அதே FIR-ஐ வைத்து அவரை முடக்கிய ‘உள்நோக்க’ அமைப்புதான் ‘இரட்டை வேட அதிகார மையம்’ இங்கு முழு பலத்துடன் இயங்கியுள்ளது. நீதிமன்றம் கண்டித்த பிறகேனும், ‘யார் FIR பதிய உத்தரவிட்டார்கள்?’ என்ற அடிப்படைக் கேள்விக்கு விடை கண்டு பிடிக்கப்படுமா? இல்லை, ‘உள்நோக்கம்’ கொண்டவர்கள் இப்போது ‘மௌனத்தின்’ பின்னால் ஒளிந்துகொள்வார்களா?

அடுத்து என்ன? ‘உள்நோக்கம்’ உடைக்குமா நீதிமன்றம்?

இந்த வழக்கு வெறும் இடைநீக்க உத்தரவுக்கு எதிரான மனு மட்டுமல்ல; லஞ்ச ஒழிப்புத்துறையின் உள் செயல்பாடுகளை அப்பட்டமாக்கும் ஒரு சட்டப் போராட்டமாக மாறியுள்ளது. ஜூலை 9 ஆம் தேதி இந்த வழக்கு மீண்டும் விசாரணைக்கு வரும்போது, லஞ்ச ஒழிப்புத்துறை இயக்குநர் தரப்பு என்ன பதில் அளிக்கப் போகிறது என்பது மிகவும் முக்கியமானது. FIR வரைவுக்கு ஒப்புதல் அளித்த அதிகாரிகள் யாரும் இதுவரை கேள்வி கேட்கப்படாத நிலையில், நீதிமன்றம் உண்மையான ‘உள்நோக்கத்தை’ உடைக்குமா, அல்லது இதுவும் ஒரு ‘பணியிட மாற்றத்துடன்’ முடித்து வைக்கப்படுமா?

கேள்விகள் ??

01) ஆய்வாளர் விமலாவுக்கு FIR பதிய உத்தரவிட்ட மேலதிகாரிகளை, ‘உள்நோக்கத்துடன்’ இடைநீக்கம் செய்த வழக்கில் குற்றவாளிக் கூண்டில் ஏற்றாமல், அவரை மட்டும் பலிகடாவாக்கியது ஏன்?

02) லஞ்ச ஒழிப்புத்துறை இயக்குநர் அருணின் ஒப்புதலுக்குப் பிறகே FIR பதியப்பட்டுள்ள நிலையில், இந்த இடைநீக்கத்தின் பின்னால் உள்ள ‘உள்நோக்கம்’ குறித்து தமிழக அரசு விளக்கம் அளிக்குமா?

03) ‘77,000 கோடி ஊழல்’ போன்ற பெரிய வழக்குகளை விசாரிக்க வேண்டிய லஞ்ச ஒழிப்புத்துறை, தன் துறைக்குள் உள்ள அதிகார சண்டைகளை தீர்க்க முடியாமல் திணறுவது, தமிழக ஊழல் ஒழிப்பு முயற்சியின் தோல்வியை ஒப்புக்கொள்ளளுமா?