வைத்தியரிடம் லஞ்சம் பெற்ற காவல் ஆய்வாளர் – தலைமை காவலர் சஸ்பெண்ட் !!?

வைத்தியரிடம் லஞ்சம் பெற்ற காவல் ஆய்வாளர் – தலைமை காவலர் சஸ்பெண்ட் !!?

சிவகங்கை மாவட்டம் ,சிங்கம்புணரி காவல் ஆய்வாளர் மற்றும் தலைமைக் காவலர் லஞ்ச புகாரில் பணியிடை நீக்கம் – சிசிடிவி காட்சியே ஆதாரம்!

நாட்டு வைத்தியரிடம் மாதந்தோறும் பணம் கேட்டு மிரட்டிய ஆய்வாளர்; 4 மாதங்களுக்கு முன் பணம் வாங்கிய காட்சியுடன் வெளியான வீடியோ – மாவட்ட காவல் கண்காணிப்பாளர் உத்தரவில் நடவடிக்கை.

சிவகங்கை மாவட்டம், சிங்கம்புணரி காவல் நிலைய ஆய்வாளர் மற்றும் தலைமைக் காவலர் ஒருவர், நாட்டு வைத்தியர் ஒருவரிடம் லஞ்சம் பெற்ற புகாரில் பணியிடை நீக்கம் செய்யப்பட்டுள்ளனர். இது தொடர்பான சிசிடிவி காட்சிகள் சமூக வலைதளங்களில் வைரலானதை அடுத்து, சிவகங்கை மாவட்ட காவல் கண்காணிப்பாளர் அபிஷேக் குப்தா நடவடிக்கை எடுத்துள்ளார்.

என்ன தான் நடந்தது? – விவகாரம் என்ன !!?

சிவகங்கை மாவட்டம் நெற்குப்பை அருகே ஆத்திக்காடு பகுதியைச் சேர்ந்த நெடுஞ்செழியன் (வயது 45), ‘புத்தூர்கட்டு பாண்டி’ என்ற பெயரில் சிங்கம்புணரியில் எலும்பு முறிவு, முடக்குவாதம் உள்ளிட்ட பாதிப்புகளுக்கு சிகிச்சை அளித்து வந்தார். இவர் சமூக வலைதளங்களில் பிரபலமடைந்ததால், தமிழகம் மட்டுமின்றி கர்நாடகா உள்ளிட்ட பிற மாநிலங்களில் இருந்தும் ஏராளமானோர் சிகிச்சைக்காக வந்ததாக கூறப்படுகிறது.

இந்நிலையில், முறையான மருத்துவக் கல்விச் சான்றிதழ் இல்லை என மருத்துவ இணை இயக்குநர் அளித்த புகாரின் பேரில், கடந்த ஜனவரி மாதம் சிங்கம்புணரி போலீசார் நெடுஞ்செழியனை கைது செய்து, அவரது மருத்துவமனைக்கு சீல் வைத்தனர். பின்னர் ஜாமீனில் வெளியே வந்த அவர், தனது தோப்பில் ‘செம்புவேல் முருகன்’ என்ற பெயரில் கோயில் அமைத்து அங்கு சிகிச்சை அளித்து வந்ததாக கூறப்படுகிறது.

நாட்டு வைத்தியர் வெளியிட்ட அதிரடி வீடியோ – ஆய்வாளர் மீது கடுமையான குற்றச்சாட்டு !?

இதற்கிடையில், நெடுஞ்செழியன் சமூக வலைதளங்களில் ஒரு வீடியோவை வெளியிட்டார். அதில், தற்போது சிங்கம்புணரி காவல் ஆய்வாளராக பணியாற்றி வரும் சீனிபாபு, மாதந்தோறும் பணம் கேட்டு தொல்லை கொடுப்பதாகவும், பணம் கொடுக்காவிட்டால் பொய் வழக்கு பதிவு செய்வதாக மிரட்டுவதாகவும் குற்றம் சாட்டியிருந்தார்.

மேலும், சிங்கம்புணரி காவல் நிலையத்தில் முன்பு பணியாற்றிய அதிகாரி ஒருவரின் பெயரையும் குறிப்பிட்டு, தலைமைக் காவலர் ஜெயராஜ் 4 மாதங்களுக்கு முன் தன்னிடம் பணம் வாங்கிய சிசிடிவி காட்சியையும் வெளியிட்டிருந்தார். இந்த வீடியோ மற்றும் சிசிடிவி காட்சிகள் சனிக்கிழமை (ஆகஸ்ட் 22) சமூக வலைதளங்களில் வைரலானது.

விசாரணை மற்றும் நடவடிக்கை

வீடியோ மற்றும் சிசிடிவி காட்சிகள் வைரலானதை அடுத்து, சிவகங்கை மாவட்ட காவல் கண்காணிப்பாளர் அபிஷேக் குப்தா, இந்த புகார்களின் உண்மைத் தன்மை குறித்து விசாரணை நடத்த உத்தரவிட்டார். நடத்தப்பட்ட ஆரம்பகட்ட விசாரணையில், புகார்கள் உண்மையானவை என கண்டறியப்பட்டது.

இதையடுத்து, ராமநாதபுரம் டி.ஐ.ஜி. மணிவண்ணன், சிங்கம்புணரி காவல் ஆய்வாளர் சீனிபாபு (வயது 52) மற்றும் தலைமைக் காவலர் ஜெயராஜ் (வயது 45) ஆகியோரை பணியிடை நீக்கம் செய்து உத்தரவிட்டார். தலைமைக் காவலர் ஜெயராஜ் தற்போது கல்லல் காவல் நிலையத்தில் பணியாற்றி வருவது குறிப்பிடத்தக்கது.

போலீஸ் விஷன் புலனாய்வு !

நாட்டு வைத்தியர் ஒருவரே தனக்கு எதிரான லஞ்ச புகாரை ஆதாரங்களுடன் சமூக வலைதளங்களில் வெளியிட வேண்டிய நிலை, காவல்துறையின் மீதான பொதுமக்களின் நம்பிக்கை எந்த அளவிற்கு சீர்குலைந்துள்ளது என்பதை காட்டுகிறது.
காவல் நிலையத்திற்குள் புகார் அளித்தால் நடவடிக்கை எடுக்கப்படாது என்ற அச்சமே இதற்கு காரணம்.

மாதந்தோறும் பணம் கேட்டு, மிரட்டி, நாட்டு வைத்தியரின் வாழ்வாதாரத்தையே பறிக்க முயன்ற ஆய்வாளரின் செயல், சீருடையின் கண்ணியத்தை குலைத்துள்ளது. ஒரு காவல் அதிகாரி, சட்டத்தை பாதுகாப்பதற்கு பதிலாக, அதையே ஆயுதமாக்கி மக்களை கொள்ளையடிப்பது கடும் கண்டனத்திற்குரியது.

சிசிடிவி காட்சிகள் மற்றும் வீடியோ புகார்கள் வைரலான பிறகுதான் நடவடிக்கை எடுக்கப்பட்டுள்ளது. இது, காவல்துறையின் உள் ஒழுங்கு நடவடிக்கைகள் எவ்வளவு மெதுவாகவும், பாதிக்கப்பட்டவர்களின் புகார்களுக்கு முக்கியத்துவம் அளிக்காமலும் இருப்பதை வெளிப்படுத்துகிறது. மக்களின் புகார்களை தீவிரமாக எடுத்துக் கொள்ளும் மனநிலை இன்னும் உருவாகவில்லை.

தலைமைக் காவலர் ஜெயராஜ், தற்போது கல்லல் காவல் நிலையத்தில் பணியாற்றி வருகிறார். ஆனால், அவர் மீது ஏற்கனவே லஞ்ச புகார் உள்ள நிலையில், அவரை அங்கு தொடர்ந்து பணியில் வைத்திருப்பது சரியான நிர்வாக முடிவா? இது கேள்விக்குறியே.

ஆய்வாளர் சீனிபாபு மாதந்தோறும் பணம் கேட்டதாக புகார் உள்ளது. இவர் மீது ஏற்கனவே இதே போன்ற புகார்கள் இருந்தனவா? அல்லது இது முதல் முறையா? இது குறித்து முழுமையான விசாரணை நடத்தப்பட வேண்டும்.

நாட்டு வைத்தியர் நெடுஞ்செழியன், முறையான கல்விச் சான்று இல்லாத போதிலும், ஏராளமான மக்களுக்கு சிகிச்சை அளித்து வந்துள்ளார். இது, மக்கள் மத்தியில் மருத்துவ வசதிகள் குறித்த போதிய விழிப்புணர்வு இல்லாததையும், மருத்துவமனைகளில் கிடைக்கும் சிகிச்சைகள் குறித்த அதிருப்தியையும் காட்டுகிறது.

அடுத்த நகர்வு ?

பணியிடை நீக்கம் செய்யப்பட்ட ஆய்வாளர் சீனிபாபு மற்றும் தலைமைக் காவலர் ஜெயராஜ் மீது மேலதிக விசாரணை நடத்தப்படும். விசாரணை முடிவுகளின் அடிப்படையில், அவர்கள் மீது குற்றவியல் வழக்கு பதிவு செய்யப்படலாம். மேலும், நாட்டு வைத்தியர் நெடுஞ்செழியனின் மருத்துவ நடைமுறைகள் குறித்தும் தனி விசாரணை நடைபெற வாய்ப்புள்ளது. இந்த சம்பவம், காவல்துறையில் லஞ்சம் மற்றும் ஊழலை ஒழிப்பதற்கான மேலும் கடுமையான நடவடிக்கைகளுக்கு வழி வகுக்குமா என்பதை பொதுமக்கள் எதிர்பார்த்துக் கொண்டிருக்கிறார்கள்.