மோப்ப நாய் படைப் பிரிவில் பணியாற்றி வந்த சீஸர் ,  உடல் நலக்குறைவால் விடைபெற்றது !

மோப்ப நாய் படைப் பிரிவில் பணியாற்றி வந்த சீஸர் உடல் நலக்குறைவால் விடைபெற்றது !

திருநெல்வேலி மாவட்ட காவல்துறையின் மோப்ப நாய் படைப்பிரிவில் பணியாற்றி வந்த “சீஸர்” (Caesar) என்ற மோப்ப நாய், உடல்நலக் குறைவு காரணமாக உயிரிழந்தது.

நீண்ட காலமாக திருநெல்வேலி மாவட்ட காவல்துறையின் மோப்ப நாய் படைப்பிரிவில் சிறப்பாகப் பணியாற்றி வந்த சீஸர், பல்வேறு குற்றவியல் விசாரணைகள், தடயங்களை கண்டறிதல், வெடிபொருட்கள் மற்றும் போதைப்பொருட்களை கண்டறிதல் உள்ளிட்ட முக்கிய காவல் பணிகளில் திறம்பட செயல்பட்டு காவல்துறைக்கு சிறப்பான பங்களிப்பை வழங்கி வந்தது.

உடல்நலக் குறைவு காரணமாக சிகிச்சை பெற்று வந்த நிலையில், சீஸர் உயிரிழந்தது, காவல்துறையினர் மத்தியில் மிகுந்த சோகத்தை ஏற்படுத்தியுள்ளது.

இதனையடுத்து, சீஸரின் சேவையைப் போற்றும் வகையில், அரசு மரியாதையுடன் இறுதி அஞ்சலி செலுத்தப்பட்டது. காவல்துறை மரபின்படி, 24 குண்டுகள் முழங்க அரசு மரியாதையுடன் சீஸருக்கு இறுதி மரியாதை செலுத்தப்பட்டு, பின்னர் நல்லடக்கம் செய்யப்பட்டது.

இந்நிகழ்வில், காவல் அமலாக்கப் பிரிவு (PEW) துணைக் காவல் கண்காணிப்பாளர் திரு. சந்திரன்,மோப்ப நாய் படைப்பிரிவு காவலர்கள் மற்றும் ஆயுதப்படை காவலர்கள் ஆகியோர்கள் கலந்து கொண்டு மலர்வளையம் வைத்து அஞ்சலி செலுத்தி, சீஸரின் அர்ப்பணிப்பு மிக்க சேவையை நினைவு கூர்ந்தனர்.

சீஸரின் சீரிய பணியைப் பாராட்டியும், அதன் மறைவுக்கு ஆழ்ந்த இரங்கலையும் போலீஸ் விஷன் வாயிலாக தெரிவித்துக் கொள்கிறோம்.